6,987 guests

Ganid: Ugat ng Problema sa Transportasyon

  • Written by Emil Jon Soriano
  • Published in Pananaw Pinoy
  • Read: 361

Nagsimula ang sigalot sa pagitan ng Land Transportation Franchising and Regulatory Board (LTFRB) at ng dalawang malalaking Transport Network Service Companies at popular na Ride Sharing App na Grab at Uber sa hindi pag-comply ng dalawang kumpanya sa direktiba ng LTFRB. Noong nakaraang taon kasi, ipinatigil muna ng ahensya ang pagtanggap ng mga bagong applications at pag-activate ng mga driver app ng mga nagnanais maging bahagi ng transport service ng Grab at Uber.

Subalit makalipas ang isang taon na in-effect ang direktiba ng LTFRB, bumulaga sa kanila ang mahigit na 50,000 units ng Grab at Uber na bumibiyahe sa buong Metro Manila.  Ayon sa pinagsamang datos ng dalawang kumpanya, 4,000 units lamang ang may legal na papel para makapag-operate.  Kaya naman, ang 70% na mga nag-o-operate sa lansangan sa kasalukuyan ay pawang mga “kolorum.” Nagsimula sana ang Grab at Uber sa isang magandang hangarin na makatulong sa pagresolba ng lumalalang trapik sa Metro Manila at makagpagbigay ng mas ligtas, maginhawa at mahusay na public transport service sa mga commuters.   Ngunit mukhang hindi ito naging makatotohanan  sa dami ng bilang ng kanilang mga bagong units na pumapasada sa lansangan. Nawawalan na ng saysay ang orihinal na hangarin ng Grab at Uber.

Nasa ugat ng kontrobersiyang ito ay ang pagkahulog ng Grab at Uber sa pagiging ganid.  Sa kabila ng direktiba ng LTFRB noong isang taon, itinuloy nila ang pag-activate ng mga aplikante at ang aktibong pag-recruit nila ng mga bagong drivers.  May mga katapat pa nga na cash incentives ang mga drivers na nag-rerefer ng bagong aplikante.  Kung tutuusin, malaki din kasi talaga ang kinikita ng Uber at Grab sa bawat unit na aktibong bumibiyahe sa lansangan.  Sa bawat pasahero na naisasakay, 20% ang kinukubra ni Grab at 25% naman kay Uber.  Kung ang isang unit ay kumikita ng 3,000 pesos kada araw, 600 pesos nito ang napupunta kay Grab at 750 pesos naman kung kay Uber.  Ipagpalagay na may 30,000 units ang bumibyahe, kumikita ang mga kumpanyang ito ng nasa 18 million pesos sa isang araw. Kung mas maraming sasakyan ang lalabas upang bumiyahe, higit na mas malaki ang makukubra ng Grab at Uber.  Wala pa dito ang iba pang mga fees na inire-require nila sa pag-activate ng driver app at alok nilang serbisyo upang lakarin ang mga papel for accreditation sa LTFRB na nasa 4,000 hangang 6,000 pesos  kada unit.

Kaya’t tila tama lamang na maging accountable sa gobyerno ang mga kumpanyang ito.  Bilang regulatory body ng gobyerno, kailangan talaga ng LFTRB na mag-impose ng mga patas na regulasyon at mga tamang pamantayan sa accreditation.  Makakatulong ito sa larangan ng security at taxation na kailangan ma-generate ng gobyerno. Ngunit hamon din sa side ng gobyerno, na ayusin ang sistema ng accreditation at siguruhing efficient ang kanilang serbisyo upang mapabilis ang pag-process sa pagkuha ng prangkisa ng mga aplikante.  Huwag nawa ito pagmulan ng pagiging ganid sa kanilang panig at maging oportunidad sa pagkakaroon ng korapsiyon.

Sa kasalukuyan, may mga panukalang naihain at may ilan na ding batas na sinisimulan tungo sa pag-institutionalize ng Ride Sharing app bilang isang ganap na option ng public transportation.  Dalangin natin na sa lahat ng panukalang batas na hinahain ng mga mambabatas, sa sistemang itatalaga ng gobyerno para sa mga Ride Sharing Companies, nawa ay maging patas at makatarungan ito para sa lahat. Huwag masilaw ang sinuman sa laki ng pera na nakukuha sa negosyong ito.  Kung ganid ang paiiralin ng bawat players sa usaping ito, ang riding public ang siguradong talo sa huli. Paalala ng Biblia, “Ang taong gahaman ay lumilikha ng kaguluhan, subalit ang mga nagtitiwala sa Panginoon ay pagpapalain” (Kawikaan 28:25).

Mapapakinggan ang Pananaw Pinoy sa radyo, sa programang “Oras ng Pilipinas,” sa pagitan ng 7-8:30 ng umaga, ng 702 DZAS (AM) -FEBC Radio. Para sa suhestiyon at komento,mag-text sa 0928-364-2090 o mag-email sa This email address is being protected from spambots. You need JavaScript enabled to view it. .