Bureau of Customs X-Ray ang dapat ‘sampolan’ ni commissioner Jagger

November 15, 2018

“KASALANAN” namin!

Ito ang “buod” ng mensahe ng BoC-PIAD (Public Information and Assistance Division), matapos “mabigla” at “madismaya” ang media na ‘nagco-cover’ sa Aduana hinggil sa ‘viber post’ noong Martes na ‘5-day wait rule’ ng mga mamamahayag bago makakuha ng panayam kay bagong Customs commissioner, Jagger Guerrero at iba pang opisyales ng ahensiya.

Sa mensahe pa ni ‘PIAD officer, Gerty Pagaran, kahapon, “walang utos” o ‘guidance’ si Comm. Jagger na busalan, agh, limitahan, ang ‘access’ ng media sa kanya.

“For the record, Customs Commissioner Rey Leonardo Guerrero did not give PIAD such guidance, whether verbal or in writing,” ani Pagaran.

Ayun pala naman. Wala naman palang “direktiba” si Comm. Jagger, eh sino kayang “magaling” at “maepal” na opisyal d’yan sa PIAD ang “nag-isip” ng nasabing “panukala” na wala tayong nakikitang resulta kundi, ngayon pa lang, “ikanal” na si Comm. Jagger sa media?

‘But moving on,’ ayon pa nga kay Pagaran, itinakda ngayong araw ang pag-uusap ng ‘Customs-beat media’ at ng Aduana, sa pangunguna ni Atty. Dino Austria, kung saan inaasahan naman natin na magiging “maganda” ang resulta. Harinawa.

* * *

At nabanggit na rin lang si Comm. Jagger, sapul sa kanyang pag-upo bilang “bosing” ng Aduana noong Oktubre 31, kapalit ni ngayon ay TESDA director general, Isidro Lapeña, wala na siyang ginawa kundi “magpaalala” sa mga kawani at opisyales ng Aduana, na “tumigil na” sa mga gawaing tiwali.

Aniya pa, “walang puwang” (‘no room’) ang BoC sa korapsyon sa ilalim ng kanyang administrasyon.

Tanong pa nga niya sa kanyang ‘flag-raising speech’ noong Lunes, bukod sa hindi nga naman puwedeng “dalhin sa hukay” ang nakulimbat, agh, “naipon” na yaman, matutuwa raw ba ang pamilya at mga anak ng mga kawani ng BoC kung malaman na galing sa “iligal” ang “pagkain” sa kanilang harapan? Oo nga naman.

Ibinisto pa ni Comm. Jagger na hindi pa man “nag-iinit” ang kanyang “wetpaks” sa pag-upo bilang Customs commissioner, ilang sulat na agad ang kanyang natanggap na lahat ay humihingi ng “pabor.”

At siyempre, dear readers, natawag din ang pansin ng mga miron ng sabihin ni Comm. Jagger na “wala siyang binibigyan ng awtoridad na “gamitin” ang kanyang pangalan sa ano mang transaksyon sa pantalan, yeheyy!

* * *

“Kahit paano” naman, dear readers, ay “kilala” natin si Comm. Jagger na mula sa ‘PMA Maharlika Class of 1984.’

Una nating nakilala si Comm. Jagger nang “mapasyal” tayo sa Eastern Mindanao Command (EMC) bago niya pinalitan ang ating kaibigan na si EMC commander, Lt. General Leo Baladad.

At bago nalipat sa EMC, si Gen. Jagger ang commanding general ng Special Operations Command, Third Infantry Division at, chief of staff ng Philippine Army.

“Noon” pa man, dear readers, “alam” na natin na “magiging” ‘AFP Chief of Staff’ si Gen. Jagger dahil “noon” pa man, “kinumpirma” na ito ng ilang mga kaibigan natin sa Sandatahang Lakas kaya nang “maganap,” kasama tayo sa mga natuwa dahil nga ‘well-deserving’ siya sa nasabing posisyon  dahil na rin sa kanyang mga “pinagdaanan” at mga naging karanasan bilang sundalo ng ating Republika.

At kung marami ang bumilib sa “simple” at “disiplinadong pamumuhay” ni Comm. Jagger noong siya ay nasa militar pa, marami rin ngayon ang “nag-aabang” kung kaya rin niyang “bastunin” ang mga “pasaway” at mga “abusado” sa kanyang bagong ahensiya?

Halimbawa na lang kasi, Comm. Jagger, itong ‘XIP Project’ (X-Ray Inspection Project) ng Aduana.

Kung babalikan, ang pagiging “palpak” ng XIP ang dahilan kung bakit “nakalusot” ang sinasabi ng PDEA na 1,600 tonelada ng shabu sa termino ni Comm. Sid Lapeña -- na naging dahilan kung bakit natanggal siya sa puwesto.

Tandaan na ang pagpipilit ng XIP-MICP na ‘No Suspect’ ang mga ‘images’ ng mga kontrobersiyal na ‘magnetic scrap lifters’ na “pinaglagyan” ng mga shabu -- at dumaan sa tungki ng kanilang ilong -- ang dahilan kung bakit sa dakong huli, “natsugi” sa puwesto si Comm. Sid at ‘vindicated’ sa kontrobersiya si XIP ‘original chief,’ Atty. Lourdes Mangaoang.

‘But in fairness’ kay XIP chief, Atty. Czae de Guzman, naniniwala tayong matapat at mahusay niyang ginagampanan ang kanyang tungkulin at responsibilidad.

Hindi rin natin kilalang personal si Atty. Czae bagaman alam natin na “magaling” ang aleng ito at “seryoso” sa kanyang trabaho; bilang dating hepe ng BoC-IPRD (bago siya nalipat sa XIP), bilyones ang halaga ng mga pekeng produkto na “nasakote” ng Aduana at ‘on the record’ lahat yan, dear readers.

‘Yun nga lang, alam din niya na ‘layering’ ang “sindikato” sa pantalan at ang sabi pa nga sa atin ay “tulungan” siya na mahubaran ang mga korap d’yan sa XIP.

“What I want to know is what is happening (in the) field. Nag-iisa lang ako, ang dami nila (mga korap).”

Dangan kasi, Comm. Jagger, may natanggap akong reklamo na “iniiipit” ng ilang mga “elemento” d’yan sa XIP-MICP ang ilang mga container vans dahil “pumalag” na ang ‘consignee’ sa hinihingi nilang “tara!”

Kumbaga, katulad sa termino ni Comm. Sid, hindi rin “tinatayuan ng balahibo sa takot” ang mga korap at abusado d’yan sa XIP. ‘Yun bang, kulang na lang nilang sabihin na, ‘Gen. Jagger Guerrero, ex-AFP chief bilang Customs commissioner? Wala yan, hehehe!’

At magkano ang “pinag-uusapan” dito, tanong mo ba? Hindi P1,000 (na “regular” na tara sa bawat container van), hindi rin P5,000 – P10,000 (na “tara” naman para sa mga ‘special shipment), bagkus, P100,000 sa isang “lata!”

Susmariosep! Hindi ba “sobrang kasibaan” na ang tawag dito, dear readers?

Sa patuloy namang “pagsasabog ng lagim” nitong mga nasa XIP, hindi ba sila ang magandang “sampolan” mo, Comm. Jagger?

Abangan!