‘Enrollment’ sa BoC-EGDVS, nagsimula na?

September 28, 2018

TALAGA yatang “minamalas” itong si Bureau of Customs (BoC) intel agent, Jimmy Sambahon Guban, mga kabayan.

Sa naging pagdinig (naman) ng Kongreso noong Huwebes hinggil sa patuloy na ‘drug smuggling’ sa bansa na “dumadaan” sa Aduana, tila gusto rin ng mga kongresista na “maranasan” nitong si Guban, ang ‘accommodation’ ng Kongreso sa kanilang mga “detenido.”

Higit tatlong linggo na ngayon na ‘under Senate detention’ itong si Guban, mga kabayan, dahil sa “paningin” ng mga senador, “ayaw” niyang magsabi ng “katotohanan, at pawang katotohanan lamang.”

Translation? “Sinungaling” (daw) na testigo itong “bata” at ‘college classmate’ ni PDEA deputy director for administration, Ismael Fajardo (na ‘floating status’ na rin pala matapos sibakin ni PDEA director general Aaron Aquino).

Ang hinihinalang pagsisinungaling nitong “bata” rin (daw) ni dismissed PNP colonel, Jojo Acierto. ay patungkol sa dalawang insidente ng drug smuggling noong nakaraang buwan kung saan “lumalabas” na direkta siyang nasasangkot.

Anang mga kongresista sa pagdinig noong Huwebes, “sila” naman ang “magkukulong” kay Guban sa Kongreso -- sakaling matapos niya ang ‘sentensiya” na ibinigay sa kanya ng Senate blue ribbon committee sa pangunguna ni Sen. Richard ‘You-Know-Me’ Gordon.

At pareho din ang kanilang batayan sa naging “rason” ni Sen. Dick: “Sinungaling” ang mamang ito.

Kumbaga, ‘from one detention place to another detention place’ ang nangyari dito kay Guban kaya, talagang “inaalat” ang isang ito, hindi ba, dear readers -- at least may ‘air condition’ hehehe, ayy, huhuhu!

* * *

Sa kabila naman ng tila “walang katapusan” na mga pagdinig ng Senado at Kongreso hinggil sa  mga anomalya sa Aduana, hindi naman naging dahilan ang mga ito upang “mabalam” ang mga isinusulong na reporma sa ahensiya ni Comm. Sid Lapeña.

At isa nga sa mga “reporma” na gustong maipatupad ni Comm. Sid na naisulat natin (at lumabas dito sa People’s Tonight kahapon) ay itong ‘Enhanced Goods Declaration Verification System’ (EGDVS).

Kung “hot na hot,” err, ‘very enthusiastic’ si Comm. Sid sa pagkukuwento sa atin ng mga “benepisyo” nitong EGDVS (na mas kilala bilang ‘1-Assessment), siyempre, ganito rin “katindi” ang “pakiramdam” ng mga kritiko ng bagong sistemang ito.

At ang kanilang kritisismo ay nakasentro sa dalawang bagay -- “Labag” umano ito sa batas at ikalawa, hindi ito “solusyon” sa korapsyon sa ahensiya at sa “tara system” na alam nating gusto nang “matuldukan” ni Comm. Sid.

Ayon pa nga sa “tunay, palaban at makabayan” na unyon sa BoC, ang ‘BoC Employees Association (BOCEA), “hindi” sila tutol sa ‘objective’ ni Comm. Sid na mapatigil ang “lagayan” sa loob ng ahensiya.

Ang sinasabi ng unyon, huwag madaliin ang implementasyon nito at pag-aralan munang mabuti.

Bukod sa isyu ng ‘legality’ sinasabi naman ng ilang miron na “suntok sa buwan” at mananatiling isang “matayog na pangarap” ang gustong mangyari ni Comm. Sid at PDU30 na dahil dito sa EGDVS/1-Assessment, mababawasan na ang problema ng korapsyon sa ahensiya.

Bakit kamo, DoF Secretary Carlos Dominguez?

Dangan kasi, “bukas” na raw ang ‘enrollment’ sa hanay ng mga ‘players’ na gustong “paikutan” itong bagong sistema.

At dahil gusto nating maniwala na “wagas” at “dalisay” ang layunin nina AOCG deputy commissioner, Edward James Dy Buco at, MISTG deputy commissioner, Jeffrey Ian Dy, na tulungan si Comm. Sid sa kanyang “krusada” laban sa korapsyon, dapat agad nilang imbestigahan ang sulsol, agh, sumbong ng ilang miron, na ilang mga “taga-MISTG at AOCG” ang “nag-iikot” na umano ngayon sa hanay ng mga ‘customs players.’

Ayaw rin nating paniwalaan na sa ngayon, “nakakanerbiyos” na P30,000 hanggang P35,000 “per lata” ang umano’y hininging “tara” nitong mga tulisan sa AOCG at MISTG, kapalit ng ‘no hassle, no delay, no alert’ na mga transaksyon sa ilalim nitong EGDVS.

Kung magkano naman ang ‘actual enrollment fee,’ ikinuwento ng mga miron na ‘negotiable’ ang bagay na ito dahil “depende” sa kategorya at reputasyon ng isang ‘customs player.’

Malaki ang responsibilidad nitong MISTG at AOCG sa pagtitiyak na magiging matagumpay ang operasyon nitong EGDVS.

Kaya siguro “malaki” rin ang umano’y hinihinging ‘enrollment fee’ ng ilang mga tulisan d’yan, hehehe!

And take note, Comm. Sid, hindi sa hanay ng mga may transaksyon sa POM at MICP nagsisimula itong ‘enrollment’ para sa EGDVS.

Simulan mo raw ang imbestigasyon sa mga ‘outports,’ partikular na d’yan sa bahagi ng Mindanao, sakaling interesado ka na busisiin ang bagong eskandalong ito.

Abangan!