‘Harinawang makatulong sa Aduana’

December 18, 2018

“HARINAWA.”

Ito ang may “agam-agam” na “panalangin” ng ating mga miron sa pantalan hinggil sa mga “binuhay” na “reporma” ni Bureau of Customs (BoC) commissioner, Rey Leonardo ‘Jagger’ Guerrero, ,marahil sa kanyang “paniwala” na makatutulong ang mga ito na mahusay niyang magampanan ang kanyang trabaho -- at hindi “mapahiya” kay Pang. Rody.

Una na rito ay ang ginawang “pagbabalik” ng ‘sectioning’ sa ‘Assessment/FED’ na “nilusaw” sa termino ni Com. Nick Faeldon at ganap na naipatupad sa termino naman ni Comnm. Sid Lapeña.

“Katwiran” kasi ng mga ‘pro-sectioning,’ DoF secretary, Carlos Dominguez, ang pagkawala ng ‘sectioning’ ang “dahilan” (daw) sa nangyaring “paglusot” ng mga iligal na droga sa termino nina Comm. Sid at Comm. Nick.

Kung ‘andyan anila ang ‘sectioning’ hindi makalulusot ang mga iligal na droga dahil “eksperto” na sa pagbusisi ng mga dokumento at mga deklarasyon ang mga ‘examiner/appraiser’ sa bawat ‘commodity section’ ng Aduana.

Kumbaga, sa dokumento pa lang, “bistado” na nila kung may “tama” o wala ang isang kargamento, kaya ang sagot natin ay, Owws?! Talaga?! Eh, di... wow, hahaha!

Ang “punto” naman ng mga naunang administrasyon, ‘outdated’ na ang sistemang ito at hindi na “bagay” sa ating makabagong panahon.

‘Por que’ anila pa, na “pinaghirapan” ng Kongreso na maipasa ang ‘RA 10863 (‘Customs Modernization and Tariff Act, CMTA), kung hindi rin lang ipatutupad ang mga probisyon nito, aber?

At higit sa lahat, ang ‘sectioning’ mga kabayan, ay talaga namang isa sa mga “ugat” ng matinding korapsyon sa ahensiya, believe it or not, Comm. Jagger.

Dangan kasi, babalik na naman sa pantalan ang “suki system” sa pagitan ng mga ‘examiner/appraiser at mga broker/importer kaya… ‘Happy days are here again,’ yeheyy!!

Bagaman, “sana” naman, mga bosing, huwag lang sa sarili ninyong mga bulsa kayo magpakita ng “malasakit” sa pagbabalik ng ‘sectioning,’ hindi ba, PDU30?

“Tumulong” din naman kayo sa pagtiyak na makokolekta ng BoC -- at malampasan pa nga -- ang ‘collection target’ nito, tama ba, Sec. Dominguez?

Huwag kalimutan na ang koleksyon ng Aduana ang “pampondo” ng gobyerno sa mga programa nito at “pambayad-utang” ng ‘Pinas sa mga dayuhan.

Kumbaga, kung nabubuhay kayo sa “prinsipyo” na, “para sa bayad,” aba’y huwag kalimutan ‘yung “para sa bayan,” tama ba, kasamang Allan Encarnacion?

Dangan kasi, “mabuti” na lang at higit P6 bilyon lang ang naging “salto” ng BoC sa buwan ng Nobyembre, ang unang buwan sa puwesto ni Comm. Jagger.

Nasabi nating “mabuti” at higit P6 bilyon “lang,” dahil nga kasi, ‘yung dalawang pinalitan ni Comm. Jagger sa puwesto -- Comm. Bert Lina at Comm. Nick -- ay nagtala ng ‘collection shortfall’ na  higit P11 bilyon at higit P13 bilyon, ayon sa pagkakasunod, sa kanilang unang buwan sa puwesto, hehehe!

Isa pang desisyon ni Comm. Jagger na maraming miron ang “nag-aalala” kung makatutulong sa kanyang programa para sa Aduana ay ang “pag-imbudo,” ehek, “pagbibigay” sa ‘Import Assessment Service’ (IAS) ng “solong kapangyarihan” hinggil sa halaga ng mga produkto na dapat patawan ng buwis.

Sa mga “beterano” sa pantalan, Comm. Jägger, “isa” lang ang “kahulugan” nito: ‘benchmarking is back -- with a vengeance,” yeheyy ulit, hihihi!

At dahil “sapilitan” ang ginawa ni Comm. Jagger sa “pag-aalis” ng “kapangyarihan” sa mga ‘customs district collector’ sa ilalim ng CMO 26-2018– kahit ang kapangyarihang ito ay nasa CMTA -- hindi na rin dapat magtaka kung “dumami” pa ang mga ‘collection districts’ na “sasalto” sa kani-kanilang target collection.

Alam ba ninyo kung bakit, dear readers? Dahil ang ‘prerogative’ ng mga customs collector na magdesisyon sa halaga ng buwis na dapat bayaran ng isang ‘consignee’ ang kanilang ‘’marketing strategy’ upang “makumbinsi” ang mga malalaking ‘importer’ na “lumipat” sa kanilang distrito.

At ngayon nga na ang lahat ay “nganga,” eh, paano pa ‘mag-market’ ang mga collection district ng kanilang serbisyo samantalang ang trabaho na lang nila ngayon sa ilalim ng CMO 26-2018 ay ‘mag-check’ ng ‘attendance’ ng kanilang mga tauhan?

Translation? Sa buwan ng Nobyembre, 4 sa 17 collection district ng BoC ang “sablay” sa koleksyon. Kung “tumaas” pa ang kanilang bilang at tuluyan nang “maligwak” sa “balon ng kawalan” ang programang pampinansiya (fiscal plan) ng gobyerno, eh, wala nang dapat ipagtaka, hane, Sec. Dominguez?

Sa ngayon, marami nang mga ‘stakeholders’ ang “naglalabas” ng kanilang “hinagpis” sa mga ipinatutupad na “pagbabago” ni Comm. Jagger, partikular na itong CMO 26-2018.

Eh, yun ba namang ‘plastic product’ na 8 tonelada galing China, “magbubuwis” ka ng P250,000 “per lata” -- wala pa ang “tara” -- hindi ka ba “iiyak” dear readers?

Lalo pa nga at hindi ka naman “miyembro” sa ‘elite club’ ng ‘Davao Group,’ hehehe, ayy, huhuhu!

Sa ganang atin naman, kinikilala natin ang ‘crucial role’ ng IAS, bilang sentrong tanggapan ng BoC sa pangangalap nito ng ‘reliable data base’ para sa halaga ng mga kalakal na dapat magbayad ng buwis.

At “aminin” man ito ng BoC o hindi, panahon pa ni Comm. Guillermo Parayno (1992-1998), kung saan unang ipinatupad ang “reporma” sa IAS, “palpak,” “sablay” at “bigo” ang IAS sa “misyon” nito, simula noon hanggang ngayon.

Aber, hindi ba IAS din ang isa sa mga “sumabit” sa kontrobersiya ng “payola” noong termino ni Comm. Nick na inimbestigahan ng Senado?

Subalit, dahil gusto nating maniwala na sinsero si Comm. Jagger na huwag mapahiya kay Pang. Digong, eh, ulitin na lang natin ang “panalangin” ng ating mga miron -- “harinawang makatulong ang lahat ng ito sa iyo, Comm. Jagger.”

Abangan!!!