Ingat sa mga ‘nagmamalasakit,’ Commissioner Jagger

December 10, 2018

BAGO ang lahat, binabati muna natin si Parañaque City mayor, Edwin Olivarez, isang matagal nang kaibigan na alam nating “sinsero” ang “pagmamalasakit” sa kapwa.

Matagal na rin kaming magkakilala ni Mayor Edwin -- the “best governor that Laguna never had” -- at natutuwa naman tayo na bagaman “madalang pa sa patak ng ulan” kung kami ay magkita, wala tayong natatanggap na ano mang “masamang balita” kung pagiging lingkod-bayan din lang ang pag-uusapan.

Aber, kahit pala “tinangka” natin kahapon na “mapasyalan” si Mayor Edwin sa kanyang opisina ay hindi kami magkikita, hehehe.

Dangan kasi, kahapon pala ay higit 4,000 sa kanyang mga kababayan sa Bgy. San Antonio ang binigyan niya ng ‘Pamaskong Handog’ na mga ‘grocery items’ at ‘cash gift’ para sa mga may kaarawan, talaga rin naman!

Ayon pa sa ating kaibigan na si Mar Himenes, “target” pala ni Mayor Edwin na bago ang araw ng Pasko, “madalaw” at “makadaupang palad” niya ang higit na 65,000 ‘senior citizens’ ng Parañaque!

Ito ay upang personal na maiabot sa kanila ang kanyang handog na mga ‘grocery items’ at siyempre, ang kanyang ‘cash gift’ na P1,000 para sa mga nagdiriwang ng kanilang kaarawan!

Sinulat natin ito dahil nga natutuwa tayo sa mga magagandang ginagawa ni Mayor Edwin at siyempre, para malaman na rin ng mga “pulitikong pulpol” sa Parañaque na huwag na silang “magtangka” na lumapit sa akin para “tulungan” sila ngayong halalan, hane?

Yes, mga bosing. Huwag na kayong magtangka dahil nga bagaman hindi kami nagkikita at nag-uusap ni Mayor Edwin, sa kanya pa rin ako “nakapusta,” malinaw ba?

Mabuhay ka, Mayor Edwin!

* * *

“Natutuwa” naman tayo, dear readers, sa ginawang “pagbawi” ni Customs commissioner, Jagger Guerrero, sa kanyang ‘memo’ na kahit ang ‘cellphone charging’ ay bawal na sa Aduana kaya… “puwede” na ulit pumasok sa trabaho kahit “lobat” ang mga empleyado, yeheyy!

Kung babalikan, inilabas ni Comm. Jagger ang memo noong Nobyembre 15, bilang “pagsunod” sa direktiba ng DoF sa mga ahensiya nito na gumawa ng mga pamamaraan para “makatipid” ang gobyerno sa gastusin.

‘Yun nga lang, ‘to the extreme’ naman ang naging “ideya” ng “ogags” na “nagsubo” ng nasabing memo kay Comm. Jagger, dahilan para agaran niya itong bawiin, yeheyy ulit!

Sa ganang atin naman, ipinakita ni Comm. Jagger sa ginawa niyang ito na ‘sensitive’ siya sa mga nangyayari sa kanyang bagong ahensiya at hindi magdadalawang isip na gawin ang nararapat, hindi ba, mga kabayan?

Kaya sa puntong ito, mainam na rin sigurong ‘reminder’ sa kanya at sa kanyang mga pinagtitiwalaan na huwag nang maniwala -- at huwag na nilang pansinin -- ang mga umano’y ‘intel report’ ng kung sino-sinong nagpapakilalang “nagmamalasakit” (daw) at “gusto lang tumulong” (daw ulit) sa kanila.

Nalaman kasi natin na may ilang “nagbabato” sa kanila ng umano’y mga ‘intel report’ kung kaninong mga kargamento ang dapat na “maalerto.” Partikular na binanggit sa atin ay itong sinasabing ‘Paras Group.’

Susme. Kung hindi tayo nagkakamali, sa mga ganitong indibidwal na natin “binalaan” si Comm. Jagger sa ating nakaraang kolum (Nobyembre 30, 2018; ‘Mga korap sa Bureau of Customs hinahamon si Comm. Jagger’).

At kung hindi natin nabanggit sa nasabing artikulo kung “kanino” dapat “mag-ingat” ang ‘Team Jagger’ eh, kanino pa ba kundi, dito sa mga katulad nitong ‘Paras Group’ na kasama sa mga “isinuka” ni ex-AFP chief at BoC ex-DCI Jessie Dellosa dahil sa isyu ng ‘extortion’ at “tara.”

Ayon pa sa mga miron, isa lang daw ang grupong ito sa mga “nagbabato” ngayon ng ‘tip’ sa tanggapan ni Comm. Jagger laban sa mga kargamento na gusto nilang ma-isyuhan ng “AO” (alert order).

Translation? Aba’y hindi malayo sa katotohanan na “kumikita” na ang mga damuhong ito, tama ba, mga kabayan?

Kung hindi pa kasi alam ng ‘Team Jagger’ ang ‘power to alert’ ay ginagawang ‘marketing strategy’ ng ilang grupo para sa kanilang ‘extortion operation.’

Kumbaga, kapag “naipakita” nila sa kanilang mga biktima na “kaya” nilang magpa-alerto ng kargamento, aba’y “alam” na sa pantalan ang “susunod na kabanata:” manghihingi na sila ng regular na “tara” kapalit ng hindi na muling pag-alerto ng kanilang kargamento.

Kumbaga ulit, Comm. Jagger, ang tawag natin dito ay ‘Oplan Pakilala,’ hehehe!

Kaya nga ang ating sinserong “payong kaibigan” kay Comm. Jagger? “Ingat palagi” Comm. Jagger!