‘Lobat’ bawal na sa Aduana

December 04, 2018

BAGO ang lahat, binabati natin ang ating mga kasamahang “maniniyot” (photojournalists) sa ‘SPPA’ (Senate Press Photographers Association) sa pangunguna ni Pang. Cesar Morales, matapos silang maisumpa, ehek, manumpa, sa harap ni Senate Majority Leader, Migs Zubiri kahapon.

Mga dakilang miron, ehek, ‘witness’ naman kami ni Press Photographers of the Phil. (PPP) president, Jay Jalbuna at ang inyong lingkod, bilang ‘vice president’ ng National Press Club.

Muli, mabuhay kayo mga brod!

* * *

“Tinuldukan” na kahapon ni Senate blue ribbon committee (SBRC) chairman, Sen. Richard ‘You-Know-Me’ Gordon, ang pagdinig sa huling insidente ng “nakalusot” na shabu sa Aduana noong Hulyo na naging dahilan naman upang masibak, ayy, mapalipat ng posisyon, bilang ngayon ay TESDA director general, si Comm. Isidro Lapeña at mapalitan siya ni ex-AFP chief, Rey Leonardo ‘Jagger’ Guerrero.

Ayon kay Chairman Dick, inaasahan niyang maisumite sa ‘Senate plenary’ ang ‘committee report’ ngayong buwan bagaman “nagkukumahog” ang Senado na maipasa ngayong buwan din ang pambansang badyet para sa susunod na taon.

Bagaman wala pa ang report, inaasahang “swak na sa balde” ng mga kaso sina Customs intel officer, Jimmy Guban, ex-PDEA deputy director, Ismael Fajardo at ex-PNP colonel, Eduardo ‘Jojo’ Acierto.

Sa imbestigasyon kasi ng SBRC, silang tatlo ang mga ‘direct participants’ sa likod ng nasabing drug smuggling kaya “sila” rin ang dapat na maging mga ‘principal suspect’ sa eskandalong ito.

Ayon pa kay Sen. Dick, “kakausapin” na rin niya si DoJ Secretary Menardo Guevarra hinggil sa pagsasampa ng mga kaso hindi lang dito sa grupo nina Guban, bagkus, sa iba pang mga indibidwal, batay na rin sa kani-kanilang partisipasyon.

Translation? Kung sa pagtatapos ng ‘public hearing’ kahapon ay nagawa pang “magbiro” ni Sen. Dick na “pinatawad” na niya ang mga sinungaling, ehek, pasaway na mga “testigo” kasabay nang paghingi rin ng “patawad” kung may mga “nakaldag” siya sa kabuuan ng nangyaring inquiry, aba’y huwag isipin ng mga “sumabit” sa isyung ito, ‘all is forgiven,’ hane?

Take note, ang naging imbestigasyon ng SBRC ang dahilan kung bakit sa kulungan bumagsak itong si Mark Taguba at iba pang mga “sumabit” sa ‘shabu smuggling’ noong isang taon, sa termino ni Comm. Nick Faeldon.

SBRC report din ang dahilan kung bakit “nagkahetot-hetot” at nasibak si DoJ Secretary Vitalino Aguirre sa nangyari namang ‘payola scandal’ sa Bureau of Immigration (BI) kung saan sumabit ang dalawang ‘law classmates’ nila ni PDU30 sa San Beda.

Kumbaga, witnesses and resource persons should not be fooled into complacency by the kind, and sometimes, fatherly demeanor of Sen. Dick because he takes his job as Senate chief graft and corruption buster, very seriously.

* * *

At nabanggit na rin lang si Comm. Jagger Guerrero, natutuwa naman tayo at kahapon ay dumalo siya sa naging pagdinig ng Senado kung saan nakita natin ang kanyang seryosong pakikinig -- at malaking interes -- sa nangyari sa Aduana.

Nagkaroon din kasi tayo ng pagkakataon, kasamang Jun Veneracion, na maitanong kay Comm. Jagger, ang ilan sa kanyang mga “napirmahan” na mga ‘memorandum’ na muling “nagpataas ng kilay” ng mga miron.

Una na rito ay ang bagong “paghihigpit” sa BoC main office (Port of Manila) kung saan mistulang “kargamento” na rin ang ‘classification’ ng mga ‘stakeholders’ (kasama na ang media) dahil mayroon na ring ‘color coding,’ ahahay!

‘Yung bang… kung may ‘yellow lane,’ ‘red lane’ at ‘green lane’ ang mga kargamento, mayroon namang ‘green lane,’ ‘pink lane,’ ‘orange lane’ at ‘blue lane’ para sa mga may transaksyon sa POM.

And take note, DoF secretary Sonny Dominguez, “kargamento” na lang yata talaga ang “tingin” ngayon ng Aduana sa madlang pipol dahil kung may ‘DEA’ (designated examination area) para sa mga kargamento, aba’y ‘restricted’ na rin ang galaw ng kahit sinong may transaksyon sa POM, batay sa kanyang nakuhang ‘color coding,’ hehehe, ayy, huhuhu!

Halimbawa? Kung ‘green lane’ ka, aba’y hanggang OCCOM building ka lang, alright? Oops! Huwag kang “lalampas” sa OCCOM dahil puwede kang “damputin” ng Customs Police, aguy naman, hihihi, ayy, huhuhu!

Kung sino na namang ungas, agh, “ogags” ang nagawang “mabola” si Comm. Jagger, hindi pa natin kilala pero, dapat talagang “unahin” ni Comm. Jagger sa “listahan” ng mga dapat na niyang sibakin sa Aduana -- dahil “ikinakanal” siya nitong ‘adviser’ niyang ito, sa totoo lang!

Nasabi natin ito dahil nang itanong natin kay Comm. Jagger, batay sa isa pa niyang ‘memo’ na napirmahan din niya niya noon namang Nobyembre 22, 2018 (‘Prioritizing Expenditures and Cutting Down Spending for 2019’), aba’y “bawal” na rin ang “lobat” sa BoC, huwahh!

Ang “nasusulat” kasi sa Section IV, paragraph “C” ay ganito (basa!):

“Charging of personal cell phones and use of other non-official electrical equipment/appliance shall be strictly prohibited.”

Translation? “Tiyakin” na ‘fully charge’ ang mga cellphones ninyo dear readers -- sampu ng mga cellphones ng mga empleyado at opisyales ng Aduana -- pagdating ninyo sa pantalan dahil nga “bawal” na ang “lobat,” har,har, har!

Ayon naman kay Comm. Jagger, “fake news” daw ang sinasabi nating ito.  “Ano ka ba naman Paul, pati ba naman yan (‘charging’ ng cellphone), ipagbabawal ko pa,” sagot pa niya sa atin.

‘Yun nga lang, ito  ang ‘page 2’ ng nasabi niyang memo, kaya, ‘you may want to review this memo,’ Comm. Jagger.

At dahil naniniwala tayo kay Comm. Jagger, eh, sino na namang ‘not-so-bright-boy-or-girl’ ang gumawa ng nasabing ‘attachment’ na ang tanging layunin ay muli siyang “ikanal?”

Sa ganang atin kasi, ang tanging “ibubunga” ng mga ganitong mga regulasyon ay “madismaya” at mawalan ng “bilib” sa kanya ang mga ‘stakeholders’ sa pantalan kaya, “ingat palagi” Comm. Jagger.