Modernong Imbudo sa BoC?

February 27, 2020

NAGING “bisita” ng Bureau of Customs (BoC) noong Miyerkules si ARTA (Anti-Red Tape Authority) director general, Jeremiah Belgica, na kapatid naman ni PACC (Presidential Anti-Corruption Commission) commissioner, Greco Belgica.

Ang ARTA, mga kabayan, ang isa sa mga pinakabagong ahensiya ng pamahalaan na ang sentrong trabaho ay “pabilisin” ang mga transaksyon at mga proseso sa lahat ng tanggapan ng gobyerno bilang pagsunod sa kampanya ni Pang. Rody laban sa ‘red tape.’

“Humuhugot” naman ng lakas ng loob, ehek, ng awtoridad at responsibilidad ang ARTA, sa RA 11032 na mas kilala naman bilang ‘Ease of Doing Business Act of 2018,’ isang batas na masasabing magandang ‘legacy’ sa taumbayan ng kasalukuyang gobyerno.

Sa inilabas namang ‘press release’ ng BoC sa naging pagbisita ni DG Jeremiah, “ibinida” ang bagong ‘Customer Care Center’ (CCC) na sinasabing higit na “magpapabilis” sa mga proseso sa Aduana bilang bahagi ng bagong ’10-Point Priority Program’ ni Comm. Jagger Guerrero para sa ahensiya ngayong taon. Pormal na inilunsad ang CCC noong nakaraang Pebrero 7.

Eh, ano naman ang sabi ng mga miron? “Harinawa” nga raw na talagang maging mabilis ang proseso ng mga transaksyon sa Aduana dahil dito sa CCC (na dating ‘broker’s lounge sa Port of Manila), ahahay!

Kung sa bagay, maganda     naman sa “teorya” itong CCC, mga kabayan, sa katunayan, hanggang ngayon, wala pa tayong natatanggap na “reklamo” mula sa hanay ng ating mga kaibigan na may mga transaksyon sa pantalan. Kung meron man, ‘minor issues’ lang naman na alam nating ma-aaksyunan sa proseso ng ‘fine tuning’ ng operasyon nito, kaya “ayos” ba, Comm. Jagger, hehehe!

‘Yun nga lang, bagaman wala pang “matinding” reklamo, marami naman silang “pangamba,” DG Jeremiah.

Halimbawa na lang dito ay “nadagdagan” (daw) ng higit 2 oras ang pagproseso ng mga ‘customs entries’ bagaman talagang “matumal” pa ang transaksyon sa POM dahil sa epekto naman ng sitwasyon sa China (COVID-19) kung saan marami pa ring pabrika ang tigil-operasyon.

Take note dear readers, aabot sa 80 porsiyento ng daloy ng mga angkat na produkto (imported products) na pumapasok sa Aduana ay galing sa China.

Eh, paano naman (daw) kaya kung maging “normal” na ang sitwasyon kung saan “libu-libo” na ang nag-file ng mga ‘entries’ na “iiwan” nila sa ‘Brokers’ Lounge/CCC,’ ilang oras naman kaya silang “nakanganga,” hehehe, ayy, huhuhu!

Hindi rin (daw) ‘accurate’ dahil hindi naman (daw) ‘real time’ ang takbo ng proseso ng mga papeles sa Aduana na “nasusundan” lang ng mga ‘customs brokers’ at ‘document processors’ sa mga computer terminal ng BoC.

Ilang beses na nga raw nangyari—ngayon pa lang na kaunti pa lang ang transaksyon—na “nakita” nilang ‘final assessment’ na ang kanilang kargamento sa ‘BoC monitors’ kaya puwede nang bayaran ang “balanse” ng kanilang buwis sa mga bangko at “tawagan” ang kanilang mga ‘delivery truck’ para naman mailabas na sa pantalan ang kanilang kargamento. Eh, yun pala, wala pang final assessment, ahahay!

Ang resulta? Dagdag gastos at abala. Muli, paano raw kaya kapag “normal” na ang ‘business climate’ sa pantalan?

Bakit “ganito” ang sitwasyon, tanong mo ba, DG Jeremiah? Bukod kasi sa “naipaliwanag” sa iyo, itong CCC ay “bahagi” ng ‘no-contact policy’ sa pagitan ng mga “personero” at mga empleyado ng BoC na gustong mangyari ni Comm. Jagger.

Sa “teorya” kasi, itong ‘no-contact, equals no tara,’ gets mo ba, kaya, “ayos,” hindi ba?

Kaya nga, matapos iwan sa ‘Brokers’ Lounge/CCC’ ang mga customs entries, wala nang alam ang mga personero sa susunod na mangyari sa kanilang mga dokumento dahil hindi na sila puwedeng pumasok ngayon sa ‘Assessment Division.’

At ‘yun nga lang ulit, dear readers. Bagaman maganda talaga itong ‘no contact policy’ ni Comm. Jagger para mabawasan pa ang ‘human intervention’ sa proseso ng mga kargamento (read: “mabawasan” ang “lagayan” sa ahensiya), ewan natin kung binigyang-pansin ang ‘human factor?’

Aber, d’yan kasi sa ‘2-hour delay’ na inaabot (ngayon pa lang) ng isang ‘customs entry’ bago makarating sa Assessment Division, ayaw kasing maniwala ng mga miron na, kapit ka sa silya, DCI Raniel Ramiro, ayaw nilang maniwala na walang “kumikita” d’yan, kahit pa-etneb, etneb lang, hehehe!

Eh, sa opinyon pa nga ng iba, isang “modernong imbudo” itong CCC na pagsisimulan ng bagong “saray” (layer) ng ‘red tape’ at ‘petty corruption.’

Hindi naman kasi natin “masisisi” ang mga miron kung magtamang hinala na “makakaltasan” lang (ulit) sila sa CCC para lang “mabilis” na madala ng CCC ang kanilang mga papelespapuntang ‘Marine/EPU’ – at mula dito papuntang Assessment—dahil na rin marahil sa opisyal na itinalagang “magmando” sa “tanggapan” na ito.

“Bakit” nga raw ba “pinagtiwalaan” ni Comm. Jagger itong nasabing opisyal samantalang marami na itong “sinabitan” na mga transaksyon?
‘Yun lang, hehehe!

Eherm, KB, is that you, again, hehehe!
Abangan!