‘P15 milyon sa ulo ni Colonel Jojo’

December 06, 2018

BAGO ang lahat, sinsero at malakas na pagbati ng ‘Congratulations!’ kay ‘Eastern Mindanao Command’ (EMC) commanding general, Lt. General Benjie Madrigal, bilang bagong ‘AFP Chief of Staff.’ 

Ilang taon na rin ang nakaraan nang una nating “makadaupang palad” si Gen. Benjie, nang una siyang ‘ma-assign’ sa Southern Luzon Command (Solcom) kung saan ‘na-appoint’ din siya bilang ‘area commander.’ 

Kung “bakit” si Gen. Benjie ang “pinagtiwalaan” ni PDU30 at hindi ang iba pang “kandidato” ay “sinagot” naman sa atin ng kanyang ‘mentor,’ err,  nang kanyang pinalitan sa puwesto, si ex-AFP chief at ngayon ay DILG secretary, Ed Año -- “Magaling ‘yan, Pare!’ ‘Yun na, hindi ba, kaibigang Josephine Jason Codilla, hehehe! 

At dahil si Sec. Ed pa nga ang unang “nag-anunsiyo” sa ‘appointment’ ni Gen. Benjie eh, dapat tayong maniwalang lahat na “magaling” nga itong bago nating ‘Chief of Staff!’ 

“Translation” dear readers? Kahit kailan talaga, hindi pa “sumablay” sa atin si Gen. Año, hehehe! 

Inaasahan ang ‘formal turnover ceremony’ ngayong Disyembre 12, sa pagreretiro naman ng isa pa nating kaibigan, si Chief of Staff Gen. Carlito Galvez kaya, ‘welcome back to the civilian rank,’ Gen. Gálvez at ‘good luck and our people’s best wishes to you, Gen. Madrigal! 

At napag-usapan na rin lang ang mga dating chief of staff, aba’y “sundot” ang inabot ko, kasamang Dexter Gatoc, dito kay ex-AFP chief at ngayon ay Customs commissioner, Rey Leonardo ‘Jagger Guerrero’ matapos ko siyang “batiin” kahapon ng ‘Happy Birthday’ batay sa isang ‘post’ sa “FB” na nakita natin. 

“Sorry. Hindi ko birthday, Paul,” ang sagot sa atin ni Comm. Jagger, ahahay! Dangan nga naman kasi, December 17 pa ang ‘birthday’ ni Comm. Jagger kaya ‘the appropriate greeting should be, “Advance Happy Birthday, Comm. Jagger!” 

* * * 

“Tinuldukan” na noong Lunes, Disyembre 3, ni Senate Blue Ribbon Committee (SBRC) chairman, Sen. Richard ‘You-Know-Me’ Gordon, ang imbestigasyon hinggil sa ikalawang insidente ng ‘shabu smuggling’ sa bansa sa nakaraang dalawang taon. 

(Kung babalikan, dear readers, unang “nagkabistuhan” sa nangyayaring ‘drug smuggling’ dakong Mayo 2017, sa termino ni Comm. Nick Faeldon na halos 10 buwan matapos siyang italaga bilang “bosing” sa Aduana noong Hulyo 2016).

(Ang ikalawang insidente, tulad ng alam na ng lahat ay noon lang nakaraang Hulyo, halos 11 buwan naman matapos palitan ni Comm. Sid Lapeña si Faeldon sa puwesto noong Agosto 2017). 

Dito sa ikalawang insidente, mga kabayan, ang “nadiin” nang husto ay itong si dismissed PNP colonel, Eduardo ‘Jojo’ Acierto, batay naman sa mga bintang, agh, testimonya, nitong si Customs intel agent, Jimmy Guban. 

Kung matandaan pa rin mga kabayan, may isang pagdinig kung saan tila “napilitan” si Guban na “inguso” si Acierto nang tanungin ni PDEA director general, Aaron Aquino, kung “sino” ang kanyang ‘handler’ sa operasyon laban sa iligal na droga. 

Na tila “napilitan” si Guban na si Acierto ang “ilaglag” ay dahil nakita rin ng lahat -- at ilang ulit na ipinakita ni Sen. Dick ang ‘video’ -- kung paano “siniko” ni PDEA deputy director general, Ismael Fajardo itong si Guban na “kaibigan” na pala niya sapul noong mga estudyante pa lang sila sa kolehiyo.

Kumbaga, sa ginawa ni Fajardo, gusto niyang “sabihin” kay Guban na, “Huwag ako ang ituro mo” kaya ang pangalan na sinabi ni Guban ay ang pangalan ni Acierto, aguy, aguy, aguy! 

Sa siyam na beses ng pagdinig na nasaksihan natin, dalawang beses lang nakadalo si Acierto; sa unang paglantad niya sa publiko ay “masama” pa nga ang kanyang pakiramdam dahil kagagaling lang niya sa isang ‘medical operation.’ 

Kumbaga, ‘physically unfit’ si Acierto na “pabulaanan” lahat ng naging bintang sa kanya nitong si Guban, bukod sa “kinapos” nang oras ang nasabing pagdinig.

Ganito rin ang nangyari sa kanyang ikalawa -- at huling pagsipot -- sa ‘SBRC hearing’ noong Oktubre 10. Sa obserbasyon ng mga miron, “kinapos” na naman nang oras dahil kailangan si Sen. Dick sa sesyon ng Senado. 

Sa huling paglilitis, ehek, pagdinig noong Lunes, “iniutos” na ni Sen. Dick sa PDEA at PNP ang “pag-aresto” kay Acierto at Fajardo dahil nga hindi na nakita kahit ang kanilang mga “anino” pagkatapos nang Oktubre 10. 

Kung “lulutang” pa si Col. Acierto o “papayag” siyang mahuli ng PDEA at PNP, ay isang malaking “palaisipan” sa ngayon, kasamang Non Alquitran. 

Ayon kasi sa isang mapagkakatiwalaang ‘source, ‘ Sen. Dick, aba’y may “patong” na pala na P15 milyon sa “ulo” ni Col. Acierto, susmariosep! 

Ayon sa impormante, “wanted” na ngayon si Col. Acierto, “dead and not alive,” OMG! 

At ang “masakit” pa umano dito, mga “kabaro” pa sa “serbisyo” (read: PNP) ang “nag-uunahan” ngayon na “maitumba” si Acierto na ayon naman sa ibang kaibigan ay “ibinuhos” lang  ang kanyang buong talino, galing at panahon sa paglaban sa sindikato ng iligal na droga. 

Kaya, ‘now you know,’ Sen. Dick kung bakit sa halip na muling lumantad si Col. Jojo para naman idepensa ang kanyang sarili sa mga bintang ni Guban, mas “pinili” na lang niyang “isalba” ang kanyang buhay, hane? 

Kung bakit naman si Col. Jojo lang ang may “patong” sa ulo, batay sa pagkakaalam natin, sa kabila ng katotohanan na maraming mga personalidad ang “sumabit” sa insidenteng ito katulad nitong sina Guban at Fajardo, eh, baka interesado ka ring malaman, Sen. Dick? 

Abangan!