‘Pormahan’ sa House Speakership, umiinit!

MAHIGIT dalawang buwan pa ang halalan, mga kabayan, subalit, kahit ngayon pa lang, “matindi” na ang “pormahan” sa puwestong babakantehin ni Speaker GMA.

Bakit naman hindi, samantalang tapos na ang termino ni ex-president Gloria at dahil bago na rin ang papasok na ika-18 Kongreso, kailangan talagang magpalit ng liderato.

Bagaman, “nasilat” na, hindi pa rin siyempre nawawala ang ambisyon ni ex-Speaker, Pantaleon ‘Bebot’ Alvarez, na makabalik sa poder.

Kung matatandaan, “nabitin” ang pagsisimula ng SONA (state of the nation address) ni Pang. Duterte noong isang taon, dahil kahit nakudeta, err, napalitan, ng bagong mayorya sa Kongreso si Alvarez nang grupo ni madam GMA, aba’y ‘feeling’ siya pa rin ang “bosing” at siya pa nga ang “sumalubong” kay PDU30 nang dumating ito sa Kongreso.

Komento naman ng ilang miron, “walang kadala-dala” si Alvarez at anila pa ay gustong “masaktan,” ayy, mapahiya ulit, ahahay!

Dangan nga kasi, tila hanggang ngayon ay hindi pa “nahihilot” ni Alvarez si presidential daughter at Davao City mayor, Sara Duterte, na sinasabing “nasa likod” sa desisyon ng mga kongresista na alisin siya sa puwesto -- sa araw pa mismo ng SONA ng ating Pangulo.

Na ganito nga ang sitwasyon ay “makikita” natin sa naging reaksyon ni “mayora” nang “mabalitaan” ang ginagawang “pag-iingay” ng kampo ni Alvarez hinggil sa balak niyang makabalik bilang ‘Speaker of the House of Representatives.’

“Siguro ‘yung nasubukan na at ‘di naging successful, ‘wag na siguro,” ang komento ni Mayor Sara na nabasa natin.

Translation? ‘Stop dreaming, Cong. Alvarez, walang ‘second time around’ sa iyo bilang House Speaker dahil “ayaw” ni incoming president, Sara Duterte, yeheyy, ayy, huhuhu!

Isa pang “naglalaway,” agh, “nakahanda” na pumalit kay SGMA ay si ex-senator, PDU30 running mate at ex-DFA secretary, Alan Peter Cayetano.

Sa katunayan, may nabasa pa nga tayong ‘press release’ na “suportado” ng NUP (National Unity Party) si Cayetano bilang susunod na lider ng Kamara.

Ang NUP ang umano’y ‘second biggest political group’ sa kasalukuyang Kongreso (17th Congress).

Ang “problema” nga lang, pansin ng mga miron, eh, may “bilang” ba ang NUP sa Kamara sa pagbubukas ng bagong Kongreso? Paano kung wala na, oo nga naman, hehehe!

At isa pa umanong “problema” ni Cayetano ay kung talaga bang “sureball” na ang kanyang panalo bilang kinatawan sa unang distrito ng Taguig City?

May nakahain kasing ‘election protest’ si Atty. Emilio Marañon III sa Comelec laban sa kanya at sa kanyang misis na si Mayora Lani na ngayon ay kandidato rin bilang kinatawan sa ikalawa namang distrito ng Taguig.

Sa kani-kanila kasing COC (certificate of candidacy), idineklara ni Alan na residente siya ng Barangay Bagumbayan habang inilagay naman ng kanyang misis na siya ay residente ng Barangay Fort Bonifacio.

Eh, marami talaga ang “naguluhan” sa sitwasyon mga kabayan dahil, paano nga namang nangyari na “magkahiwalay” sila ng inuuwiang bahay eh…  mag-asawa sila!

Isa rin umano sa “pinanghahawakan” ni Alan ay ang “sinabi” (daw) sa kanya ni PDU30 na “siya” ang susunod na House Speaker. Ulitin natin, dear readers: “Sinabi” (daw) sa kanya ni Pang. Rody. Sabi. Daw.

Hindi naman maiwasang “magtamang hinala” ang mga miron dahil hanggang sa ngayon, hindi ito kinukumpirma ni Pang. Digong at kahit mga opisyal sa Palasyo, walang maibigay na ‘categorical statement’ na totoo, at hindi “kuwentong barbero,” ang linyada ni Alan.

Oh, well, mas mainam siguro, hintayin natin ang susunod na kabanata kaya… abangan!

* * *

“Alert” at “hold” order sa BOC, inaabuso na naman?

Ito naman ang tamang hinala ng ilang mga miron natin sa pantalan, BoC Comm. Jagger Guerrero.

Dangan kasi, bagaman “mahigpit” ang tagubilin ni Comm. Jagger na huwag mag-hold o mag-alert ng ano mang kargamento batay lang sa “tamang hinala” (read: derogatory information) at dahil sa isyu ng ‘value,’ aba’y nagiging ‘rampant’ na naman umano ito.

Partikular na d’yan sa MICP, dapat sigurong “bantayan” ni Coll. Dino Austria ang kanyang mga “bataan” na kung kailan “palabas” na ng ‘gate’ ng MICP ang kargamento, saka sasabihin na ‘hold’ na ito dahil lang may ‘derogatory information.’

Hmm. Hindi ba may regulasyon na kapag bayad na sa buwis at arrastre, tanging si Comm. Jagger na lang ang puwedeng makapigil sa paglabas ng kargamento sa pantalan?

Ang sintir tuloy ng mga napeperwisyo, “gusto” lang (daw) yata silang “pahirapan” ng ilang mga nasa sa tanggapan ni Atty. Dino? At alam daw kaya niya at ni Comm. Jagger ang matagal nang panis na estilong ito?

Sa pantalan kasi, kapag “napag-initan” o kaya naman ay palagi kang “pinahihirapan,” aba’y isa lang ang “kahulugan” nyan -- “magbigay” ka pa dahil, “tinimbang ka, ngunit kulang,” ahahay!

Abangan ulit!