Repasuhin ang K to 12 law

October 26, 2019

TAMA lamang ang hakbang ng Kongreso na repasuhin ang K to 12 law o RA 10533. Anim na taon na ang batas na ito at kritikal na malaman kung naipapatupad ba ito ng DepEd ayon sa titik at diwa ng batas. 

Tiyak naman maraming kulang at mali at dapat itong malaman upang mapunan at maiwasan ang mga ito. Huwag natin gawing motibo sa pag- repaso ang pag-puna at paghahanap ng mga pagkakamali ng DepEd para maging dahilan para bumalik tayo sa 10 taon basic education cycle.  

Ang DepEd mismo ang humiling sa Kongreso na magdagdag ng dalawang taon sa nuon ay sampung taon na basic education cycle  mula Grade 1 hanggang Grade 10.  Ito raw ang tanging paraan para lumuwag ang masinsin na curriculum at maging handa ang bata na pumasok sa mundo ng manggagawa pagnagtapos ng  Senior High School o Grade 12.

Maliwanag ang batas sa hugis at anyo ng curriculum na dapat ipatupad “spiral progressive” ang banggit ng batas.  Imbes na Filipino at English lamang ang dalawang wikang gagamitin sa pagtuturo at pagsusulit, ang Mother Tongue Based Multi Lingual Education o MTBMLE ang konseptong gagamitin upang sa gayon madaling matuto ang bata sa wikang sinuso o wikang ginagamit sa tahanan. Para sa mga mag-aaral na bingi, ang Filipino Sign Language ang gagamitin.

Kailangan itanong sa DepEd ang mga bagay na magpapaliwanag ng tunay na nangyayari sa silid paaralan na tinatauhan ng 800,000 mga titser na palaging bukang bibig ay dagdag na suweldo.  

Unang tanong,  nasaan ang bagong kurikulum ng K to 12?  Ang palaging pintas sa lumang kurikulum ay  ang sobrang lawak ng mga dapat aralin kaya naman mababaw ang pagkaunawa ng  mga mag-aaral dito. Sa unang mga linggo,dahan-dahan ang tiempo ng pagtalakay sa mga araling paksa. Subalit dahil sa magigipit sa  araw sa  dami ng mga class suspension bunga ng masungit na panahon, biglang tutulin ng takbo ang titser sa pagtalakay ng aralin para matapos ang kurikulum. Paspasan ang pagpakabisa sa nagiging kabisoteng mga bata. Wala ng paliwanag kung bakit at paano? Puro “Sino, Saan, Kailan at Ano” lang ang kayang sagutin ng bata na malilimutan niya paglipas ng ilang panahon lamang dahil mababaw ang pagtalakay dito. Kulang tuloy ang bata sa kasanayan para makapag-isip at magkapagsuri ng malalim para maunawaan  ang paano at kung bakit ganito ang takbo ng mundong ginagalawan niya. Ayon, madaling maloko sila ng Fake News, mga investment scams at iligal recruiters at ng mga pulpol na politikong walang programa de gobyerno pero magaling makisama at mamili ng boto.  

Ikalawa, nasaan ang language transition program para Grade 4 at mga susunod na baitang?  Palaging sagot ng DepEd ay ginagawa pa ito. 6 na taon na ,ginagawa pa rin? Samantala, pagtungtong ng Grade 4, puro Filipino at English lang ang wikang pinapagamit sa bata sa loob ng silid paaralan. Taliwas ito sa RA 10533 na inatasan ang DepEd na gradual dapat ang paggamit ng Filipino at English sa pagtuturo.

Ikatlo, bakit hanggang labing-walong mga Wika lamang ang itinataguyod ng DepEd sa MTBMLE? Nasaan ang Itawis, Ibanag, Kankaney, Kalinga ? Bakit Ilokano ang ginagamit sa mga batang mag-aaral na hindi naman Iloko ang mother tongue?  Nasaan ang malinaw na hakbang ng  DepEd, KWF at ng mga LGU at NCIP para mabuo ang ortograpiya ng 170 wika ng mga Pilipino? Nasaan ang mga titser na gagamit ng FSL sa pagtuturo sa mga batang bingi?  

Ikaapat, nasaan ang mga culturally relevant na mga textbooks?  Mukhang patuloy pa rin ang paggamit ng mga aklat  na gamit ay  ang dating A for Apple, B for Banana, at C for Cat. Hindi na po uubra ito. Walang Apple tree sa Pilipinas. Puede pa ang A para sa Atis o Avocado.  B para sa Bahay o Bagnet (batang Ilokano) C para sa Chicacorn.  

Sinabi ng ADB nuon 2015 na bigo ang Pilipinas na maalis ang lubhang kahirapan sa kabila ng pagsigla ng ekonomiya dahil  hindi tinutukan ang pagpapalakas at pagpapatatag sa sektor ng agrikultura. 33% ng mga manggagawang Pilipino ay nasa sektor na ito at karamihan ng mahirap ay mga magsasaka at mangingisda. Ang padre de pamilya ng mga mahihirap ay hanggang elementarya lang ang narating.  Samakatuwid hirap silang mag-English at Filipino subalit bihasa sa unang wika nila.  Kanya nga MTBMLE ang inutos ng batas na gamitin sa pagtuturo para sa sitwasyong ito. Hindi dapat masamain ng DepEd ang mga tanong na ito.

Panahon na para matuto na ang DepEd  sa kanilang mga kamalian at kahinaan at sama-sama nating hanapan ng lunas ang mga ito.