Tier 1 ang Pilipinas sa laban sa Human Trafficking

August 01, 2020

SA pagdiriwang ng “World Day in the Trafficking of Persons” noong  Hulyo 30,2020, maipagmamalaki ng Pilipinas na isa tayo sa apat na bansa sa Asya-Pasipiko na nasa Tier 1 ng US State Department Trafficking in Persons( TIP) report,  20th edition,  na inilabas noong Hunyo 2020.

Ayon sa TIP country report, nananatili ang Pilipinas sa Tier 1 sapagkat patuloy na pinag-iigi nito ang koordinasyon ng mga serbisyo para sa mga Pilipinong galing sa ibang bansa na biktima ng human traffickers, nagdaragdag ng ayuda sa mga nakatakas sa pagka-alipin at mga testigo sa pamamagitan ng witness protection, pabahay, tulong medikal, edukasyon at trabaho, at pagpapalakas pa sa pagtugis ng mga human traffickers.

Binabati natin ang pagsusumikap at pagpapagala ng IACAT(Inter Agency Council Against Trafficking) na pinamumunuan ni DOJ Sec Menardo Guevarra.

Kapag sinabing Tier 1, taglay ng  ating bansa ang mga minimong pamantayan batay sa 3P paradigm ng Trafficking Victims Protection Act of 2000 ng Estados Unidos: 1) pag-uusig ng mga lumabag sa RA 9208 (2003)  na pinalawak pa ang saklaw at pinabigat ang parusa ng RA 10364(2012); 2) pangangalaga sa mga biktima at mga testigo laban sa mga  human traffickers; 3) at pagpapatupad ng mga programa upang maiwasan ang pagsasamantala ng mga sindikato at masasamang tao sa mga mahihirap na madaling lokohin ng mga pangakong puro kasinungalingan lamang.

Ayon sa TIP Report ng 2020, ang Pilipinas ay ilang taon din nanatili sa Tier 2 bago ito napunta sa Tier 1 noon 2016 at ika limang taon na ng ating bansa sa Tier 1. Kasama natin ang South Korea, Australia at New Zealand sa Asya at rehiyon ng Pacifico.  Daig natin ang Japan na nasa Tier 2 at ng China na nasa Tier 3.

Kung ang isang bansa ay nasa  Tier 3, hindi ito makakatanggap ng ano mang tulong sa Estados Unidos na “ nonhumanitarian” at “nontrade related”.

Sayang at hindi binanggit sa ika-limang SONA ng Pangulong Duterte ang magandang tindig ng ating bansa sa nakalipas na 5 taon sa TIP rankings.

Gayon pa man, umani ng ilang puna at nagbigay ng rekomendasyon ang TIP Report para mapanatili ng Pilipinas ang Tier 1 ranking.

Ito ang mga puna sa Pilipinas.   Hindi naging masigasig ang Pilipinas sa pag-iimbestiga at pagsasakdal sa mga opisyales ng pamahalaan na dawit sa trafficking. Pabago bago ang antas ng pagtugis sa mga iligal recruiters at iba pang labor traffickers. Hindi dinagdagan ang ayuda sa mga bata na biktima ng cyber-facilitated sex trafficking, at kulang ang serbisyo sa community reintegration at trauma care.

Siempre, ang mga rekomendasyon ng TIP ay tutukan ang mga nabanggit na puna at palakasin ang  kapasidad ng mga LGU na matulungan ang mga biktima ng trafficking na makabalik ng matiwasay sa lipunan. Pinapagtayo rin ang Pilipinas ng isang central database na tagakalap ng datos ng lahat ng mga traffickers at iligal recruiters at tumanggap ng mga payo at mungkahi buhat sa mga  naka-alpas sa kamay ng mga traffickers upang mapahusay pa ang mga patakaran ng pamahalaan laban sa mga walang kaluluwang traffickers.

Sinabi ni US Secretary of State Mike Pompeo sa TIP Report ng  2020,  na “ang human trafficking ay isang pandaigdigang suliranin na nangangailangan ng isang pandaigdigang tugon upang magapi ito sapagkat halos 25 milyon tao ang pinagkakaitan ng kalayaan at sapilitan silang inaalipin at ang kanilang pinagpaguran  ay pinagpapasasaan ng mga nagsasamantala at umaabuso sa kanila. Ang COVID- 19 pandemic ay lalo pang nagpatingkad ng pangangailangan na magtulungan ang lahat ng bansa upang labanan ang puwersa ng mga maninila na nag-aabang ng masisilong mga lalake at babae na nasa mabuway na  katayuan  ng buhay. Kailangan tambalan ng kilos ang salita upang mapigil ang paglaki ng problema”( sariling salin).

Limang taon na ang Pilipinas sa Tier 1 ng TIP. Kahit pa may Covid 19 pandemic,  huwag tayong magpabaya. Paminsan minsan na lang tayong nakakaungos sa ibang mga bansa sa Asya. Agapan natin na mapanatili natin ang ranking na ito sa susunod na dekada.

Ayon sa website ng USAID, ang kanilang tulong ay magagamit upang mapalakas ang hukbong sandatahan ng Pilipinas upang mapangalagaan nito ang malawak na karagatan at baybayin ng bansa at mapahusay ang laban sa terorismo at transnational crime. Sana ay magamit sa tama ang ayuda ng USAID para mapalayas na natin ang mga mananakop na singkit sa West Philippine Sea.